काठमाडौँ । दूध किसानलाई दुुग्ध विकास संस्थान (डीडीसी) ले अझै १५ करोड तिर्न बाँकी छ । कोभिड–१९ महामारीका कारण किसानको रकम समयमा भुक्तानी गर्न नसक्दा यस्तो रकम ४५ करोड रुपियाँ थियो । त्यसलाई घटाउँदै डीडीसीले १५ करोडमा झारेको हो ।

आफ्नो आम्दानीले तिर्न नसकेपछि डीडीसीले सरकारबाट सहुलित ऋणमा २० करोड रुपियाँ प्राप्त गरेको थियो ।

सोही रकमबाट किसानको बक्यौता रकम तिर्न सुरु गरेपछि अहिले किसानलाई असार १५ गतेसम्मको भुक्तानी भइसकेको डीडीसीका महाप्रबन्धक रुद्रप्रसाद पौडेलले जानकारी दिनुभयो । अरू बाँकी रकम भदौ मसान्तभित्र भुक्तानी गरिसक्ने उहाँले बताउनुभयो ।

असोजदेखि किसानको रकम नियमित भुक्तानी हुने दाबी गर्दै उहाँले साउनदेखि दूध सङ्कलन कम हुने भएकाले भुक्तानी नियमित गर्न समस्या नहुने बताउनुभयो ।

कोभिड–१९ महामारीका बेला दूध सङ्कलन र बिक्री वितरण समान्य नहुँदा डीडीसीको चालू पुँजीमा समेत समस्या भई किसानलाई भुक्तानी दिन गाह्रो भएको उहाँले बताउनुभयो ।

सङ्कलन अनुसार बिक्री नहुँदा धुलो दूध, बटर बनाउँदै भण्डारमा राख्ने काम मात्र भइरहेको थियो । त्यसमा चालू पुँजी फस्दा किसानको रकम भुक्तानीमा समस्या भइरहेको थियो ।

अब विस्तारै समाधान हुँदै गइरहेको उहाँले बताउनुभयो । अहिले दूधको खपतमा वृद्धि भएको हुनाले समस्या समाधानतर्फ गइरहेको बताउँदै उहाँले अब किसानको भुक्तानीमा समस्या नहुने बताउनुभयो ।